تعال خلي نركبوا في الايفكو

لما كثرت المشاوير لقيت لابد من التقفيص شوية , يعني بلاش من التاكسي الخاصة كل يوم وخلي نركب ايفكو مرة مرة , الايفوكوات كما هو متعارف عليها هي عبارة عن شبكة مواصلات يديرها مجموعة من الشباب السكونيس ( المردف) المؤهلين لعمل أي شيئ منافي للاخلاق , اولا والله الخدمة عمرها ما كانت عيب وانا نفرح لما نشبح أي شاب يخدم احسن من دقيقة دقيقة جاي ماد وجهه في الشارع ويقولك عمي نبي جني وهو اكبر مني بعشرة سنين ,وأهو عل الاقل يطلع مصروف حشيشه ,لكن المشكلة والهم الاحرف انه الايفكو هذي تعتبر مواصلات عامة يعني بيركب فيها اي واحد الكبير والصغير , البنية والعزوز , الشاب والشيباني الولد وبوه , البنت وخوها وللأسف مافيش اي احترام داخلها وذلك لانه غالبية سواقين الايفكوات قمة في الانحطاط وانعدام الاخلاق, وانا الصراحة واحد من اصدقائي كان يخدم علي ايفكو لكن اعتزل السنة اللي فاتت الحمد لله لكن مش لداعي الاصابة لانه ماشاء الله يهني علي روحه , لكن خلاص قالي فديت منها يا تولي حيوان زيهم يا متقدرش تخدم .

الكرسي الاول

وقفت الايفكو وكالعادة انهلب علي اليمين اول مامديت ايدي , توقعت لما نركب نلقي الركاب مقلوبين فوق بعض لكن مشاء الله الباين كلهم قدم في الصنعة مقعمزين ثابتين ,ركبت وبسم الله شفت الكرسي اللي ورا السواق فاضي وكيف بنقعمز, البوليطاي( محصل التذاكر) غمزلي وهزلي راسه هديكة الهزة متاع نوض ,زمطت رياقتي ودرت روحي احول وقعمزت ,انا عارف من الاول الكرسي هذا مخصص لمني وعلاش البوليطاي عيونه قريب يطلعو وهو يفنص فبا لكن هكي صرصرة, الكرسي الاول خلف السواق دائما و خلينا نقولو في معظم الايفكوات مخصص للتلخبيط , يعني خليني نقولها صراحة الكرسي هذا مخصص للبنات بس , كرسي اللقني والهدرزة مع السواق والبوليطاي , لكن البنات المحترمات عمرهم ما يقعمزوغادي الحمد لله , بالليبي انكسرت فيهم لما انا قعمزت واستوليت علي الطربيقة( المصيدة) متاع البنات .

احذر اين تقعمز
وين تقعمزفي الايفكو ديما مشكلة فلو قعمزت بروحك ما تعرفش من ممكن يجي وينبت فييك و لو قعمزت مع اي حد الله اعلم شني بيصير فيك
- فلو بتقعمز جنب حد أول شي شوفله بيطانه كانهم عرق اقعد واقف خيرلك مش ناقصة الحكاية ياسر تشم في الصنة من بعيد,الحق انا مستغرب انه في مازال ناس مصدقة انه الدوش في العيد بس .

- كانه وراك سنونه اول ما شبحت للكرسي معناه بيفتحلك موضوع وينفخلك راسك , مرة قعمزت جنب واحد ساعة وهو بيموت ويعرف شني المسج اللي قاعد نكتب فيه, يحساب روحه هو بس يقدر يشقلب عين فوق وعين لوطا علي التليفون, حتي انا مشقلبله عين فوق نشبح فيه وهو مبلحص عينه, قريب قلتله هاك اكتب انت تو انمل عليك , وبعد ما كملت سألني السؤال الليبي المشهور اللي حيسأله اي واح اول ما يشوف تليفون

شني نوعه التليفون هذا يا شبيب
سامسونج
اما موديل
شني قصدك
قصدي شني اسمه
السلحوبة
شني
السلحوبة
ما نعرفاش
قاعد جديد كيف نازل
ترا نشوفه معليشي
رد بالك عليه
وهو يقلب فيه من برة سالني قداش كلف يا خوي

اكثر شي نكرهه لما واحد يسألني بقداش , مش عارف تقول قاسميين معاي , تجي بسورية جديدة اول شي يسألوه بقداش ولما تقوله علي السعر يقولك هلبة والله لقيت زيها مش عارف وين ارخص , ديما بيطلعوك انضحك عليك وخلاص

المهم هالحصلة قلتله تره معليش هات التليفون ورخيت شواربي وفنصت عيوني فهم بروحه وانصمت.

- لو ركبت جنب شباني خودلك من نفخ الدماغ شكاير شكاير , يبدي يشكيلك ويدويلك لين تحس روحك قريب تروح معاه تشد اولاده من عنقتهم و تطيح فيهم هبك عاللي مدايرينه في الحويج المسكين.

- كانا بنت مقعمزة بروحها اتدردح وما تخممش تقعمز خيرلك .

- ولو قعمزت في كرسي فاضي مش عارف من يجيك يلصق فيك انت وحظك
مرة كنت مقعمز في امان الله ملصق وجهي عالمرش نخمم ,جت تفحفح من بعيد تقول معطر جو باخة شيشتين صنة ولا اكثر لكن اهو علي الاقل غطت علي الصنانات والروائح الكريهة اللي عالقة في خشمي , جت لابسة نظرات مدرقين وجهها من نص جبهتها لشاربها الفوقي ولابسة شكارة خيشة علي اساس وشاح طبعا موضة الايام هذي تشرك اي حاجة وتلويها علي راسها, وخلاص ضاقت عليها الدنيا جت بتقعمز جنبي
تضايقت لاني كنت مفرشخ رجليا ومطبزع في الكرسي وواخد راحتي , زدت لصقت علي الروشن وتكرمشت وحسيت روحي تقول انا البنت مش هيا لانها هي واخدة راحتها علي الاخر والحمد لله الواحد طلع يخاف ربي, الحق خفت علي روحي يا شينيك حصلة وخلاص
المهم شورني زمطت 5 ليترات رياقة لين وصلت لمشواري يالطيف وخلاص الواحد قداش بيتحمل .

الاغاني المروكية
في ظاهرة غريبة موجودة عند كل الايفكوات الا وهي الاغاني المروكية ( المغربية) اول ما تركب تلقي المروكي يلعلع علي طول رقبته وشوف روحك عاد كان السواق جوه مليح يحطلك شريط مرسكاوي صح , توا باهي المرسكاوي اهو وفاهمينه ( نكره جيه كما يكره العطشان طاسة امية كما يكره الصقعان بطانية ...الخ الخ ) لكن المروكي شني قصته مع الايفكوات كيف يفهمو فيه مش عارف, مرة راكب معانا شوره جايب شريطه معاه مده للسواق وقاله حطه استغربت لما وافق السواق لكن لما طلع شريط مروكي عرفت ان السواق مقدرش يقاوم مسكين , و أصلا علاش المسجل اساسا تركب في الايفكو تقول طالع مزرد ناقص غير التدربيك و التصفيق بس .

شباب جوه مليح
اسؤا شي ممكن يصير انه يركبو مجموعة شباب و يبدو يتكلمو تقول مقعمزين في حوازة سبان وسفاهة طول الوقت , تفنص تعض شواربك تأشرلهم تقوللهم اسكتو شي ما فيش فايدة كلام يوقف الشعر طول الطريق , هذا مش في الايفكو بس بدي الواحد لما يمشي حتي بسيارته يسكر المرش ديما وخلاص لانه الشباب ماشاء الله معاش يتحشم ولا يستحي الدوة الفارغة والسبان عنده زي حروف الجر ما يقدرش يدوي من غيرهم, تي مش مفروض هذا اخلال بالادب العام والله مفروض اللي يسب في الشارع يشدوه , خلاص الواحد فد معاش تقدر تطلع حتي انت وبوك ولا عيلتك تخاف ترد علي واحد بالسيارة وانت ساهي يحطلك كلمة لين وجهك يجف , لأمس بس في وسط البلاد زوز يبصرو علي بعض و الدوة الخامرة كلها يقولو فيها عادي في الشارع قدام الناس والله حتي برة في اوروبا ما فيش هالسبان هذا كله في الشارع تي هذا شني , معاش فيه من يربي خلي العصا تربيهم توا .

الجامعة
من ثلاث او اربع سنوات فاتو كانت الايفكوات اللي ترفع للجامعة محترمة شوية علي بقية الايفكوات , لانه فيه ناس متعلمة ومحترمة هلبة لكن شني اللي صار معرفتش , ركبت الايفكو مروح من الجامعة لقيت الايفكو مستف زوز زوز, ولد وبنت , ولد وبنت , بالك اني غالط مشيت بنكلم السواق حتي هو يهدرز علي بنت , تي اني وين يا ناس , انت في الايفكو يا باشا انت في ملتقي الاحباب , تي والله حاجة تبكي هالتفاهة اللي حني قاعدين فيها

عدة احتمالات
لما تركب الايفكو هناك اربعة احتمالات

- يا اما المرور يوقف الايفكو ويشحطكم ومرات حتي ينزلكم , المرور راسهم وراس الايفكوات ومش عارف شني ذنب الراكب يتشحط يا افندي خوذ الاوراق وخلينا نتسقدو وتو يوليلك , لا شي انزلو كلهم هني , تي باهي احني بنتعطلو توا , ما دخليش من قالك تركب معاه , والله لولا البدلة ما كنت نحترمه هالمخلوق المتخلف شني هالمرور اللي عندنا لا احترام لا اسلوب .

- يا اما الايفكو يدير حادث يتراوح ما بين الطفيف والمميت , هذا كله من التزبيز والجري , تقول رافع ثلج خايف عيه يذوب , المهم زيادة في الاحتياط خلي وصية قبل ما تركب الايفكو .

- يا اما صاحب الايفكو يتعارك مع ايفكو ثانية وتلقي روحك تتفرج علي احسن فيلم هبك في حياتك , تو كل بلاد عنده اسلوب دفاع عن النفس كارتيه بالايدين وتيكواندو بالرجلين ومش عارف شني تاني لكن في ليبيا اسلوب الدفاع عن النفس اللي عندنا اسمه الفشخ ويكون عن طريق استعمال الهراوة او المرتكة او الدبوس سميها كيف ما تبي المهم طرف لوحة باهية وانزل بيها عليه لين يبخ دم , زي الحيوانات مفيش بصارة في العراك يا ميت يا في العناية .

- يا اما توصل للمكان اللي تبيه سليم وبالتالي فانت محظوظ هلبة ولازم تشكر سواق الايفكو وتبوسله علي راسه انه وصلك بسلام .

--------------

تعال خلي نركبوا في الايفكو 424113

:pft:

هههه....والله هم يضحك وهم يبكي.....لكن إنقول ربي يهديهم و خلاص تعال خلي نركبوا في الايفكو 861407

-------------------------------------------------------------------

تعال خلي نركبوا في الايفكو 191221

هههههههه ياشينك حالة

------------------------

تعال خلي نركبوا في الايفكو PuB20820

هادا مش أفيكو هادا خرابة

إبدااااااااااااع

زيدوا منهم ماشاء الله عليه

طبعا اني هادي السنه اول مره نجرب الافيكوات طبعا لضروف العائله ميقدروش يتواجدو في اي وقت يعني باش يروحو بيا من الجامعه طبعا اول يوم روحت فيه مرضت شني هادا شي فوق الوصف ياسر الاغاني الي تنفخ الدماغ مغربي علي انجليزي علي مش عارفه شني وتاني يوم ياسيدي شداته الشرطه وراقيه مش كامله بس يلا تعودت مع اني نروح اني وبنت صاحبتي يعني لو كنت بروحي مكنتش نعرف شني اللي ممكن يصير
ونجو لموضوع السواقين بصراحه فيه الي شكله معبيها وجااي يعني تبدا حاس بروحك راكب مع مسطول وفيه اللي محترم وحتي المسجل مش فاتحه علي القوي يعني كل العينات موجوده

ميرسي علي الموضوع الحلو