امثال شعبية طرابلسية, الرجاء المشاركة ببعض الامثال

حبيت نشارك ببعض الامثال الطرابلسية من تجميعى

واكيد امثال البحر ليها نصيب فى طرابلس
============================
تعاركو الارياح جى الكيد ع الصارى
مركب فيها زوز رياس تغرق
مات البحر وصلى عليه الحوت
حوت ياكل حوت وقليل الجهد يموت
نسمة من قراجيم الحوت
0000000000000000000000000000
نجو توا للامثال الطريفة
شنو حالك يا بركة
والله عامنول يمشى والسنى يمرد
يا بوى خوذلى مرا === كان دام هالحال حتى امك بنطلقوها
ما هم الا هم السلفة == اما الحماة ماشية منتلفة
شنو حالك ؟== حال الكرموس فى الغرارة
وين عاش مشتاق لبلحة == ولما مات علقوله عرجون
اللى يكثرو فلوسه - تشيان مرته ويضيق حوشه

من الأمثال الطرابلسية القديمة المعروفة لذي الطرابلسين القدم ..
والتي حصلت عليها من خلال الوالده و الوالد...

"دير الخير في أهله وغير أهله لين تلقي أهله"
معني المثل
دير الخير للي يستحق والي مايحستحقه لين تلقي منو يقدر خيرك..

---
"الأصحاب في الوسع ياما منهم و في الضيق ماتلقاش واحد منهم"
معني المثل

الأصحاب في الفرح و في المسرات تلقاهم حواليك ووقت الضيق و العوزة ماتلقاش ولا واحد منهم

--------
"السنون بيض والقلب مريض"
معني المثل
يضحك في وجهك ومن الداخل يكرهك و مايطيقكش

----------
"أِلبس الكتان و نسي ماكان"
معني المثل
إستغني و تغير هندامه و نسي كيف كان

-مثل أخر علي نفس السياق
"الي يستغني بعد فقره يدعوله بثبات عقله"
معني المثل
الي يستغني بعد فقره يدير هلبة حاجات متع هبال

---------
"البقرة لا طاحت يكثروا سكاكينها"
معني المثل
الي تنزل بيه الدينا الناس معادش يدوروه
----
"الجمل رافع والقراد ينين"
معني المثل
واحد متحمل وغيره زعميتك حامل همه بالكدب

اللى تموت امه يتوسد العتبة ..............واللى يموت بوه يتوسد الركبة .

قاله يابوى امتا انولو شرفاء قاله امتا يموتوا كبار الحومه.

فيه اللى كلمته فى فمه وفيه اللى كلمته عند امه.

شاوره وماتعباش عليه.

كلام البكوش فى صدره.

كل عود بدخانه وكل شيخ ببرهانه.

كل ايد تمسح علي وجهها.

كل سفرة اتعلمك احداقة.

المتغطى بالايام عريان.