قصيدة .... لــــيبيـــــانـا, الشاعر: للاسف مجهول

قصيدة .... لــــيبيـــــانـا, الشاعر: للاسف مجهول Khaled103

كما نعلم اخوتى اخواتى ان شركة ليبيانا بدأت بداية متعثرة بالكثير من المشاكل فى التغطية والاتصالات
مما ادى الى ان شاعرنا هذا يفرج عن خاطرة بأبيات من الشعر عن ليبيانا وعن مشاكلها
وعرب بنغازى اكثر من يفهم هذة القصيدة لانها مذكورة فيها بعض مشاكل الشركة فى بنغازى
لا اطيل عليكم .. اترككم مع القصيدة

يلى دفعت افلوس فى ليبيانا ...راحن عليك التغطية تعبانا
راحن اخساره كل يوم منقطعه عليك حراره .. سوا كنت فى حوشك سوا سيارة ..
سوا كنت خاطم من حذا دريانه
الارسال ينقطع لاعلم لاخبارة .. لاتتصل بفلان لا بفلانه ..

يلى دفعت افلوس فى ليبيانا ...راحن عليك التغطية تعبانا

يلى دفعت افلوس موش قليله .. واللى ما خذا شفره اليوم احكيله
احكى وقوله عندى سبع طاشر ليله .. ما تغطيه نكساب يامطرانا
وسيدى خليفة وين ما نعدى له .. ع الكوبرى اللى غادى احذا الجبانه
نلقا خلايق كل حد من عيلة .. اتقول يطلبوا فى غيث من مولانا

يلى دفعت افلوس فى ليبيانا ...راحن عليك التغطية تعبانا

يلى دفعت افلوس مى من توا .. اللى فى جهازك قاعدة من جوا
هذيك بنت مكسبها امغير الدوه .. على قول نأسف كى اللى جذرانه
للناس كلها تمت اتقول عدوه ... واتباعد اللى قاعد قريب مكانه
وحتى اللى مالناس عدل جوه .. او وين ماطلب يبي عرب حبانا
اتجى معرضه فالنص كى الفتوه .. عليك بنت مافيها اقرام حنانه

يلى دفعت افلوس فى ليبيانا ...راحن عليك التغطية تعبانا

يلى دفعت افلوس فالنقال .. افلوسك مشن فالغوط يابوخال
ياما انت عندك كاثرات اموال .. والا صعدوك امين عالخزانه
حتى انكان ماعندك خبر بطال .. ولاتعرف التزوير ولا الخيانه
انخاف اتعلم من ظنا الحلال .. اللى يكولسوا واللى اصحاب شطانه
اللى يجبدوا فالناس قيل وقال .. وبين الخلايق شغلهم فتانه
وقاعدين لاتوا على هالحال .. ولا يستحوا ولا خوف من مولانا
وان جابه الا مدعى شروة الجوال .. وانكان جا مدار احيه هابا ويانا

يلى دفعت افلوس فى ليبيانا ...راحن عليك التغطية تعبانا

يلى دفعت افلوس فالموبايل .. ياما نصحتك وانت مانك سايل
وابطلت ونابيدى عليك انحايل .. ولا جاب منك فالعقاب اغنانا
القيتك امصمم عالجهاز اولايل .. نين قلت لى لازم الا اوخذانه
وترسل وتقبل من اوحود رسايل .. وحتى كلامك زاد عن ميزانه
وقدام العرب تحكى وراسك مايل .. وابيدك اتقول اتنش فى ذبانه

يلى دفعت افلوس فى ليبيانا ...راحن عليك التغطية تعبانا

يلى دفعت فلوس الاربع ميه .. من غير الجهاز النوكيا الاصليه
اللى فيه صوارة مع الخلفيه .. امخرب نواجع واجدات احذانا
اللى صاحبه ان مرت عليه وليه .. ايصور مسايلها عليك اهانه
ويورى اصحابه كلهم جمليه .. ويقول هذى اللى قلتوا انها عصرانه
والناس تختلف فى الاصل والبيتيه .. وكل حد معروف وين مكانه
ونختم كلامى عالصلاه بنبيه .(اللهم صلى وسلم على سيدنا محمد). وان تغفر اذنوب السامعين امعانا

الــلــــهم آمين

----------------------

قصيدة .... لــــيبيـــــانـا, الشاعر: للاسف مجهول 187a93278fcx1ip4

قصيدة .... لــــيبيـــــانـا, الشاعر: للاسف مجهول 187a93278fcx1ip4