الطاري بين سيد الصوب و الامبراطور

في عام 1992 كانت فيه قعدة خاصة في منطقة الرجمة
ولم يحضر احد من الغناية غير عبدالكافي الله يرحمه
فقلنا له " الليله اتشيلها علي راسك وحدك "
فقال لنا انقول لكم راي و ان كان صار منه اتجيكم قعدة سمحة
قلناله ايش هو ؟
قال تمشوا للأبيار اتجيبوا عوض حامد من المعسكر , وان كان عندكم حظ تلقوه  
"في ذلك الوقت كان عوض يقضي في الخدمة الوطنية في معسكر الابيار"
بعثنا سيارة للابيار من حسن الحظ جاء فيها عوض ,
وكيف ماقال عبدالكافي كانت ليلة من اجمل الليالي و إليكم ما قيل فيها
عبدالكافي " لنا زمان ماريناه ...... امغير جابنا طاري غني
عبدالكافي " يسوقهن الياس بعيد ...... و طاري قديم يجيبهن
عبدالكافي " ملغوبة الياس اقدعت ...... بارق الطاري جابها
عبدالكافي " الطاري معاه سحبت ...... انسيت يا غني ساعة الخطا
عوض " لولاف سحبنا طرواهم ...... و انسيناه نهار خطاهم
عوض " مع طاري غالي ننداق ...... و ننسى في ساعة الفراق
عبدالكافي " الطاري ديما له ننحر ...... ينسي في خطاك المر
عوض " مع طاري لولاف انسوق ...... يجيبن في مسارب شوق
عوض " مشيت مع طاري لولاف ...... يسوقن في غلا و ارياف
عوض " مسقي مرهونين غلاهم ...... ما انتحمل في طرواهم
عبدالكافي " ديما مرهونين اطريهم ...... تنعد ان كان انسيتيهم
عوض " منك يا مرهون ألتاعن ...... كان طروك لهن يداعن
عبدالكافي " انظاري ما يقدعن حد ...... ان كان طروه قديم الود
عوض " وين طروا غاليهن حاسن ...... فوق اترب امحرك داسن
عبدالكافي " طاري مرهونين احذاكن ...... مازال يداوي في داكن
عوض " طاري مرهون احميتيبه ...... طوحتيه قناع الغيبه
عبدالكافي " الغيبة فيها قلة خير ...... مع طاري لولاف اتطير
عوض " وين طروك اللوعة جارت ...... يالقديم الغيبة طارت
عبدالكافي " جا طاريك الليل التالي ...... سالت ما سالت في والي
عوض " اقدم طريولي تالي ليل ...... اداعيت امداعاة السيل
عبدالكافي " نقفز ياعين علي حيلي ...... كان امغير قديم اطريلي
عوض " طرولي لولاف انحريت ...... العيطة بين ارمام البيت
عبدالكافي " وين اقدم طاريهم جاها ...... حاست و الواشون احذاها
عبدالكافي " الله يخرب جال المرهون ...... قرضني قدام الوشون
عوض " م لولاف ارقاق غراضي ...... مازال لهم طرفي فاضي
عبدالكافي " مو جايب لي غير نقيده ...... طاريهم و انقول انريده
عوض " نقيدة تلحق بواشون ...... الا نا فاضي يا مرهون
عبدالكافي " ايام الفضوة ما خصيت ...... احقوق المرهون عطيت

عبدالكافي " مازال في اجروح و لذع ...... يداوي الطاري يا اقدم
عوض " انتبع ف الطاري تتبيع ...... اندوي في جرح و تلذيع
عبدالكافي " طاري مرهونين انجيبه ...... في جرح و لذع انداويبه
عوض " طاري مرهون يدويلك ...... شي و في شي يقويلك
عبدالكافي " فيه دوا و اوقات مضره ...... و انت للطاري منحره
عوض " طاري مرهونين يداوي ...... كي تلقا خراف اسطاوي

عبدالكافي " جميع ما يلم العقل ...... طاري قديم اتشوشله
عوض " جميع اللي ع العقل اتحوش ...... لطاري مرهونين اتشوش