قصيدة :( عطينى سلف عينك)

عطينى سلف عينك للشاعرة المرحومة حليمة الشريف السعيطى

عطينى سلف عينك اونبكى بيها ... عندى عين جفّ الدمع من ماقيها
عينى جفّـــــــــت .. دوم سايله لا قوننت لا كفّت
ولا عمر بقدوم الغوالى رفّــــــت
نشارف نشيّع فوق ونواطيهــــــا
مليانه عصر ما يوم قالوا خفّـــــت
ولا هى الناشده على اللى ناسيها
مشت فوق جمر النار نين تحفـّــــت
او بكت نين دمعتها نشف ما فيهــا

عطينى سلف عينك ودير جميل
حمّل عليــه وللحمول انشيــــل
قول خاطرى ما شى مستحيـل
الا كون عينى ترجع الماضيهــــا
جميلة وما تلحظ الا الجميـــــــل
وميط ما لخلايق كان مايعنيهــــا
سلفنى سلف عينك او دمع ايسيل
او نا لا نسكتها ولا نطريها
اتذرّف على ما صار صبح وليــــل
مليان خاطرى بهموم غالب فيها

اتريد ابكاها .. ابكاء عجوز قطعوا خوتها وضناها
وين ما بكت بكّــــت اللى يالاهــــا
على هول واجد قبل ساير فيهـا
اوديمه تذرّف ضايقات اوعـــــاهـا
بسيل دمع يملا لرض باللى فيها
اتشيل صوتها يشقّى اللى ينهاها
أتفــــرّج على.. يا صاحبى خليهــــــــا

اتكون عين قويّه .. بكايا وتذرف فالدموع صخيّه
عندى عين بخلت بالدموع عليــــه
نزح دمعها ما عاد بلّـــه فيها
اسنين واجده بكيتها الدعيّـــه
وكان دمعها حتى الوطاء يرويها
واليوم ريتها فى بكيها مرخيّـــة
لو لقيت بكايا لها نشريهــــــــا

اتكون سريعة فالدمع وين نامرها تكون مطيعة
لا نريد تصقيره ولا تلكيعه
ادموع حارّه لهذوب تنزل بيها
مظلوم خاطرى فى شرع كل شريعة
وما يحس بالجمرة الا واطيها
واللى تخدمه واجب عليك اطيّعه
والبيع خير من رهنت اللى تبيهـا

والله لا يوريكم حزن ولا دموع
بسلامتكم