..حياة صعبة..

..حياة صعبة..

للتحميل ،،
http://www.megaupload.com/?d=4PYY6NHN

طول الملف 4:46 دقيقة
حجم الملف 4.46 ميجا بايت

الكـلـمـاتـ

الدنيا تبحت فينا بوجه مش نزيك
الشمس اطيح والدخان يرقى والنفس يبدى يضيق
أنا وكل أصحابي في نفس الطريق
مش عارفين وين النهاية
لكن لقينا لحياتنا بداية
مافيش حد فينا خريج
بس كلنا عندنا شهادات ميلاد
بنغازي ليبيا عويل بلاد
تحكمنا تصرفاتنا لأننا امتاع انغم
من كثرة تجاربنا الفاشلة الدنيا مش لكم
أفاريات منقوبة وجوه مقلوبة
عيون فيها الامل مفقود
عصير العنب ما دارليش حل
هبوط من الزروط تقتلني نظرة الشايب
أن مافي فشي فالح واللي أمقلقني
مافيش حد من جماعتي ناجح
مافيش عندنا اختيار
للأسف مافيش عاقل فينا يقدر يصنع قرار
متربيين بطرق مختلفة بس تجمعنا نفس الافكار
مخدرات اسرع انتحار تكريس فالليل تكحيل فالنهار
احذر عقول مليانة دمار
من المسؤل عاللي صار ؟
اتبحتو فينا على أساس تافهين
ممكن تعرفو اشكالنا تعرفو اسامينا
بس والله اللي في روسنا مانكم عارفيين

*~*~*~*~*

حياة صعبة .. طايحين ما حد يصبينا
حياة صعبة .. انعيطو ما حد يسمع فينا
حياة صعبة .. كأن مش معدلين علينا
حياة صعبة .. بعدها الموت ينادينا

*~*~*~*~*

قوى لي على عيوني ضوايا السيارات
بس ماعنديش اختيار اني انغمض
مع اني مش معجب باللي انشوف فيه
فمي امسكر وعقلي يقول عالدنيا خزيه
كل سنة انزيد نكبر ازيد لون السماء يدكن
مافيش حد فينا عارف على من تبكي
مافيش حد فينا صوته مسموع لما يحكي
اربعة في سيارة الهدف دوخة عالية
التخويطة في شكارة
نظرة القدم لنا تقول على شبابنا يا خسارة
حشيش البنه فايحة
وجوه سايحة عقول رايحة
نفسيات طايحة نيكوتين فالدم
النظيفة بكم الحياة بالنسبة لهم غم
التفنيصة عالوجة مرسومة
طبق الورقة املا السيمافرو منتول حكومة
بنزينة معلمة حبوب متكلمة
كيف اللي الدنيا معانا امفلمة
شباب غاضب عقلي وأنا وماعنديش صاحب
لأن مصلحتك فوق الجميع دوخة
عين تغمز الصاحب صاحبه يبيع
كملت حياتك هكي باهي شنو نبي اندير ؟
الطريق هذي وين تشيل ؟
دوم بالا حيل جيل ورا جيل
اختلاف التفكير المستقبل مش باين عليا
من يشيل القضية ؟ من يتحمل المسؤلية ؟
المدرسة الشوكة وإلا الحوش ؟
الاستاذ الابلة الاب الام وإلا تجار الروج ؟

*~*~*~*~*

حياة صعبة .. طايحين ما حد يصبينا
حياة صعبة .. انعيطو ما حد يسمع فينا
حياة صعبة .. كأن مش معدلين علينا
حياة صعبة .. بعدها الموت ينادينا

*~*~*~*~*

سمعت جماعة من الغرب يعيطو
صغارنا ضاعو حي علينا
بس شيني تنفع بعد هاني خش النفسية
وبعد ايمن شنق روحة وانا انغني في راب
ومافيش حد حاس بينا
يدك في يدي عيط معايا قول نحنا جيل جديد جينا
ياربي يفكو علينا سامحني علي تفكيرنا
مش من العاصمة انا من ثاني مدينة
يعني ذلك واحد اثنين ثلاثة في الشوكة شباب
يعتقدو ان سلوكنا هكي عشان في عقولنا خراب
مهما تصبي تفنص مهما ادخن لعند ماوجهك يطيح
مهما تهرب من الناس مش حي حسو ان في صدورنا عذاب
طايحين مافيش حد مادلنا يده
الوقت يضحك علينا من جده
هل الزمن مناسب بيش انعلو اصواتنا ؟
وإلا خلاص الوقت فاتنا ؟
شن يعني لوحدين كيفنا فسن الزهور ؟
لما الجنون يصيطر عالمعقول ؟
شن نقدر اخرى انقول ؟

*~*~*~*~*

حياة صعبة .. طايحين ما حد يصبينا
حياة صعبة .. انعيطو ما حد يسمع فينا
حياة صعبة .. كأن مش معدلين علينا
حياة صعبة .. بعدها الموت ينادينا

*~*~*~*~*

ســـــــلام ،،