[شعر ليبي] حياتنا إلى أين؟

*قعدت مع نفسي. سألت روحي. أنا توا كم عمري؟ كم آذان سامع؟ وكم مره خشيت الجامع؟ إن كان الصلاه خمس أوقات. لعند توا كم وقت عليا فات؟ وليش أنخاف بس يومين لما نسمع افلان مات؟ ليش إحبال الإيمان فينا أقعدن مرخيات..؟ نبي نبدا القصه ونا عارف ماعنديش من وين نبدا. كيفي كيف أغلب الشباب في حاجات واجد معندناش مبدأ. الحرام إيوخر فينا وكل يوم في الأسوء..! ابلبزنا نملوا في أوقاتنا. معش عرفنا كيف أنعيشوا حياتنا. من غير كذب عالبنات. من غير علاقات. تليفونات. أفاريات. مخدرات. طريقنا كلها متاهات. أنديروا في كل المحرمات. ونسينا أن دفاترنا كل يوم يمتلين سيئات..! حياتنا كلها تفليم. سحابه سودا أمغيمه تغييم. وكل ماالواحد فينا يحاول يستقيم. بسرعه يضعف ويرد لحياه كلها تظليم..! الكساد له علينا تأثير. الشيطان أمطيحنا في فخ كبير. وحياتنا في النازل وكل يوم توخير. من ينجى من عذاب الضمير. كلتنا عارفين أن أي حاجه حرام أنديروا فيها مالهاش أي تفسير. غير أن نحنا معا ربي واخذنا تقصير...!