قاموس شبابي ليبي

اصدقائي مويضيعي هدا تدور فكرته في تجميع وتفسير الكلمات الشبابيه اللي يستعملو فيها البنات والاود
وياريت كل الاعضاء يشاركوني في الموضوع وفي تسجيل وكتابه وشرح الكلمات الشبابه
نفاخ = دوته هلبه
ي*** الدماغ= يجيب الصداع او يكسر في الدماغ
نوع نوعك نوع او نوعك نوع= مافيش زيك في التفكير والتصرف
مارشه فوق=دقه قديمه
زايده معاك=كفيت ووفيت
دير دوره وعطل=امشي ومترجعش تاني
فنزوزتك/زومتك/خنفورتك/رمتك=وجهك
في حاشيه ليبيا=معناها المكان بعيد هلللللللللللللبه
البنت هدي بيونضي=البنت هدي بيضاء هلبه يعني جبنه
جبنه =معناها بيضه لين خلاص
هاي ماي باي=تنقال لواحد صايرله الاحباط
شج/شنج=شن الجو
اجبد عليه=ماعاد تعدل عليه ولا تكلمه ولاتخالطه
فوتني=ومتدويش معاي
دوخه=واخد حاجه غلط
فاصل=مايندري عليها من زارقه ميندري علي شي

هدو اللي ادكرتهم بس
والباقيات في الطريق
هي وروني كليماتكم يا شباب ويابنات

عندى شوية حاجات
زى ....طربق عليك=زبطك أو عرفك
على الd+على دراع=جهدك وشن يجيب اهرب
ويقولوا التواجير سقيله مع الصغار ههههههه=يغنى شن يخرط
ويخرط= يدوى فى حاجه مش عارفها
متصندل=واخد حاجه غلط
امفتلك =مساوى على أحسن حاجه
واقف لروحه= مهتم بروحه
روبانجى +يروبن =يخنب سارق
لخباط=مش مزبوط أو (منافق مثلا)
بيلا+بيلو(بالطليانى طبعا الكلمه هادى لكن نستعملوا فيها)=سنفورة وسنفور
ارزين ورزينه=عاقل و عاقله
خاشا بعضها=الحكايه كبيرة
جايه شباشب أو صفار=متكنتى أو والع

يسمط فوها = يسكر "سكير ، خمر"

وين بيها = وين ماشي

البونطة / العكشة = عقبة السيجارة

قلاب = نصاب

جوك مليح = عكسها

زقطي : يعني واحد خبتي
ختشة ولا مختش : يعني واحد مهبول
طرف : معناها بنية حلوة وامورة
شلاكة : معناها حداء
حاجة صقع : معناها حاجة مش عادية مافيش منها
جكتوري : شايف روحه

شعبوط= يلبس غلاط و ادير فى حاجات عبيطه

مبورجه=سهل انك تضحك عليه

شنكه=شينه

جنقى=قنينه

نفرنقعو=نمشو

تمه الهدرة=تمه الدوة

امطنطينها=سكران

ضروبها بالزوايات= امدخن حشيش

ضروبها بالزوايات= امدخن حشيش
مبورجه=سهل انك تضحك عليه
نفرنقعو=نمشو

معنقر : شاد روحه : شيء غير عادي أو متألق ،

في تشتشة : هناك تشتشة : أي أن في الموضوع إن ،

مزبعر : حاجة قوية ،

هبود : أي شخص غير ذات أصل ،

فريشكة : عطلة ،

بحبح : يعني خذ غايتك !..

دار لاص =يغمزله
يكحل =فالت عيونه فى حاجه {انقولوا بنت}
يهيلم +يهيج= شادها دوران من شارع لي زنقه ...ألخ ألخ
اجبد عليه =يعنى فوته مادوراش

السلام عليكم ...

أخي العبرورد وزيادا شلافطي ..... أبدعت في مواضيعك ....

وهذة مشاركة مني

-=-=-

انريقل = اندخّن في ارقيلة
نتمكيط = نشرب في مكياطة
متزرّط = عالق علقة شينة
متشعرن = ضاربه الشعور
فاد = قالق
غوتشي = من غوط الشعال
بي سي = من بو سليم
=-=-=-=

المزيد ...
السحس .. مرة مرة يخرط فى خرطاط صح

التلب .. لاخدمة لا قدمة .

تحتوح .. واحد سمينة و معبي

شن الجو باهى .. معناها فوتي توى

سقيلة بروحة وحطلة اللحمة فى جيبة .. امنع توى من الاخير

اووووووما .. اهرب

معادش اتصبلة .. واحد يخرط اتقول فاقد

سكينيس .. شعبوووط درجة اولى ..

اهرب جاك الحلاق .. من الاخير واحد نفاخ واقف قدامك

خشلة ريييح .. وحد خنس منك

ديما هكي .. واحد حتى هو يخرط

مازالو ... كدس

هبي و السكف يقطر = يعني مدير لروح جو مش ليه

سحنون = دلوع البابا والماما

ضاربه الزمان تيروا = مشاكله هلبا

ضاربه الشعور = ماعنداش تقة في نفسه

جايتني شباشب = متعفلق ومتكنطي

وتو لما تصادفني حاجة جديدة .. مش حنبخل عليكم

جري بيه : ضحك عليه في موضوع

حوشكم عربي : لايقاف اي نفاخ عن الكلام

تنسّم : شم الهواء يعني روح

هيا نتنطرو : يعني نمشو بسرعة

علي راس الكاشيك : الامور مش مية المية

خليها تمصص : طلب التأني في موضوع معين

مدرس منقز : ما عنداش علاقة بالتعليم

رغوة : كلامه هلبة

شن حال ظهرك : لايقاف تهكم احدهم

هادي أقو وحدة

ههههههههههههه
عطيه فورمة هاو ار يو how are you ? ---- معناها شنى مش عايش فى البلاد ؟

موزز=بنات
مترندخ=مسطول=متعاطى مخدراة
إشنينه=صغيرة العمر
درهابي=بين وبين وتطلقأحوال الشحص
فرماط=واشى
دمدوم=حمار"أجلكم الله"
نوطو=ميه ميه
فشاك=متغطرس
هرواك=أبله
زمزاك=متسلق=متطفل
بنداق=صاحب كلمة
عكروت=واعر "كانت تطلق على الكلب الدي تقص أدنيه حتى يكون واعر وبعد تساوة الأمور أصبحت تطلق على الإنسان الواعر
وقدأعلن على دلك فى إحتجاج رسمى للكلاب المتمدنة في لندن فلى وقته وتاريخه