شنو المغزى شنو المعنى مش عارف ......هى هكى

السلام عليكــم ورحمـة الله وبركاتــه ،،

ادارة الجوازات والسجل المدنى

لو حبيت ادير جواز سفر يطلبو منك شهادة ادارية بالاسم الرباعى من السجل المدنى طبعا بعض كتيبات العائلة مفيهاش اسم رباعى يعنى حقاتهم

متطلبات امنية لا اعتراض عليها لكن ...بعض الكتيبات فيها اسم رباعى ويطلبو منك شهادة ادارية ينسخها موظف السجل المدنى من الكتيب

يعنى شنو الفائدة والمغزى ما الحاج موسى هو موسى الحاج طبعا الشهادة الادارية تدفع عليها 5.5 دينار

مختار المحلة كان فى كل منطقة حاليا تم الغاء النظام ظرورى تمشى للسجل المدنى وتاخد علم وخبر من السجل المدنى زمان تمشى لمختار المحلة

ايقولك عرفتك انت ولد فلان هات خمسين قرش ويعطيك علم وخبر واحيانا بجوها بلوشى

توا فى السجل المدنى تدفع 1.5 دينار على علم وخبر ..................
مزال ما فهمتش شنو المغزى ...................... هى هكى

هذه بنغازى يا سادة

تعودت من سنوات نرقد فى النهار وانوض فى الليل بينى وبينكم اريح فى النهار الشعب كله يشكى مفيش حد ايفرحك بشى

على الاقل فى الليل الاغلبية العظمى راقدين مريح راسى ......المهم تهورت مرة وقررت اندور فى البلاد فى النهار مريت من منطقة

كان فيها ملعب كورة ومبنى نادى صغير تفأجت انه حاليا مجمع تجارى قيد الانشاء تحت محلات وفوق مكاتب نعم الديكور والمنظر جميل

لكن وين النادى مش عارف

المشكلة ان جميع الطرق المؤدية للمجمع التجارى منتهية الصلاحية من الحفر والتكسير ولا يبدو ان اصلاحها قريب

شنو المغزى مش عارف .................. هى هكى

هذه بنغازى يا سادة 2

قالو فى مساكن للشباب قلنا كويس بدل الثروة عطو لكل شاب شقة بالتقسيط حتى لو كان ميخدمش عادى مستعد ايدبر راسه

ويدفع الاقساط فى دافع للاستمرار والمحاولة للبحث عن عمل مهما كان متعب او بعيد عن التخصص المهم ايحصل شقة

فى بنغازى مساحات فى وسط البلاد تقريبا مثل سوق العرب القديم (سوق التوانسة ) وغيرها فاضية ومهجورة وممكن

يبنو فيها اكثر من عمارة يعنى فى مساحات فاضية حتى فى داخل المدن لكن مفيش حد تحرك بيش يبينها من المسؤلين

المهم هى اتجى مجمعات تجارية ومحلات يعنى فيهن بزنس قوى بكل

ليش مزالو ما بنوهنش المسؤلين السابقين والحاليين

شنو المغزى مش عارف ............... هى هكى

نشهد بالله تعبهم الارنب

فى بنغازى اغلب الطريق الرئيسية جنبها حفر بطول الطريق مرة بيمدو كابل الهاتف ومرة المجارى ومرة ايغيرو فى جعب المياة

المهم طول العام والحفر مفتوحة بطول الطريق وفى كل المناطق معلش انتحملو مدام كله لغرض البنية التحتية ...........

واحد نعرفه عنده تشاركية من بتاعات الحفر سئلته امتى بتكمل القصة كوابل + صرف + جعب امية ...........

قال شنو اتقول انت الحفر هذين نحفرو فيهن لان فى ارنب انتبعو فيه معاش القيناه متعبنا وهو ايحفر فى البلاد بطولها وعرضها

ليش بس يا ارنب اتعب فى الناس

شنو المغزى يا ارنب ..............هى هكى

الايدى العاملة الاجنبية

فى جنبى فى الكفى واحد يا كورى يا يابانى يا صينى مش عارف اشكالهم كيف بعضهم متعرفش اتفرق نحكى عن نفسى

شكله داخل للكفى بيكلم اهله من الياهو شطارة يسى ارخص وياخد راحته ويتكلم ويوفر افلوس ماهو الدولار طايح

المهم تعبنى معاه حركلى الصفحة ايمين شوى يبعثوله رابط يبينى نفتحه له وصلى الكاميرا يبى العويلة ايشوفوه وفى الاخر طلعت الكاميرا عاطلة

لو قالى نبى شئ اخرى عمى بتاع التكنولوجيا اكيد ممكن نضربه ونسبب ازمة بين الدولتين ................

ليش بنضربه وشنو المغزى مش عارف .......................... هى هكى

واخر كلامى ان الحمد الله على نعمة الصحة ونعمة الاسلام