الرحيـــــــــــــــل, الشاعر : علي شحات

السلام عليكــم ورحمـة الله وبركاتــة

الشاعر : علي شحات

انكنك نويت رحيل ..
معاك لذن لا تقبل عليّ جميل ..
بطولة الرجا

انكنك ناوي ..
ترحل وقدري تم عندك شاوي
لا تجيب عذر ولا اتدير فتاوي ..
تبرر الخونة والخداع تزيل
ان ردت الرحيل ارحل بغير املاوي ..
دنّي جمالك للرحيل وشيل
لا في رحيلك ننقروا ع الداوي ..
ولا نقدعوا رحلك بفزعة خيل
وان كان حلّ ع الخاطر جفاك فجاوي ..
كبير هلعهن ما إيجيبهن تخليل
لنا الصبر ما كيفه اهناك امداوي ..
وحتى ان مرّ بيه يزول دا العليل
والدنيا ان زهت ميمولها الفناوي ..
واللي جفاك تلقاله اهناك بديل

انكنك نويت تهون ..
عشرانا وترحل والعهود تخون
وبلا واكده واخذ خبر مشنون ..
فينا اطري من قول قايل قيل
واصّاعب سلاك الدين ع المديون ..
والياس ع الغلا سيّطر وصار وكيل
خلي ما جرا ما بينّا مدفون ..
وان بان استره فوقه ترايب هيل
ومن حاشن عليك هنّا غلاك يهون ..
غبا وين يا مول الغثيث طويل
فيد من خلقنا رزقنا مضمون ..
والدنيا فنا والعمر بمواجيل
وما اهناك جافي فيه قلب حنون ..
ولا اهناك مكسب من ورا البخيل
وما عمرهم ذرّوا الا في عون ..
وما اهناك شي غيزه بلا بنتيل
وتصليح الميوح امغير كيد يكون ..
ان وكّد مكان القعر في المنديل
وارحل ونا ماني بها ممنون ..
الشيله ونا عابي عليك عزيل

انكان الرحيل نويت ..
وصفحة غلانا يا عزيز طويت
وبلا واكده فينا كلام خذيت ..
اتدوّر وما تلقا عليه دليل
وعشرة غلانا والعهود انسيت ..
ايام كنت خل وكنت نا الخليل
وافي معاي وسيتك داريت ..
عني وتاخذ في اقدارك هيل
وفيتلي وفيت وكي جفيت جفيت ..
وفاي وجفاي بهيل ماهن كيل
والخاطر بعد لامان به غريت ..
الله أيغربك خاين وفاك قليل
ومن حاش من شوري النظر واطيت ..
ألغب قوافلك ماني عليك نزيل
ولا يشغلك حالي انكان بكيت ..
أنت سبلتي وين الدموع تسيل
انديرك ونجبد ما جرا وخفيت ..
وعنّا الستار اللي سدلت أنزيل
كمين هول قبلك صارلي وكميت ..
خيانه وغدر وقهر وتمخليل
من ناس في عهداً مضا غاليت ..
خانوا وجافوني بعد تدليل
خطاهم احملت وبالفراق ارضيت ..
وينما معاهم طول صبري عيل
وارضيت ياسهم عقلي عليه وطيت ..
عدّيت صوبهم ماضي بعد لاويل
أصحاب المروّه عاليين الصيت ..
الجاويد كسّابت أم اذرا ميل
هل نجع متشاوط اسمّوا عيت ..
ملفا الضيف واللي عابرين سبيل
بعد عز كان اشتتوا تشتيت ..
اربنهم اجداب وحرب وتبهديل
وغبيوا أبقي ما عاد منهم فيت ..
أوهام بومهن يغرد بطول الليل
وان خانك زمانك لا تقول ابخيت ..
الدنيا قديمة تعتدل وتميل
وراه كل شي بيد حامي البيت ..
وينما عليه غاروا أصحاب الفيل

انكنك نويت أخلافي ..
وامهيّل علي صوبي رديم السافي
وكاره ودرت احلاف ضد أحلافي ..
وقاطع مع لنظار لمواصيل
لا نقولك كنك قسيت وجافي ..
ولا عليك في الخاطر نشيل غليل
ونصبر ونكما في الكنين أريافي ..
ان خثّق بشوقه خاطري الضليل
وبالاعمال ربك في العباد يكافي ..
ونا مسامحك يا عين بوكمبيل

انكنك نويت الهجر ..
خلّي فوادك صلب كيف الحجر
ما تنتظر نجمة صلاة الفجر ..
أرحل امنين يبان نخم سهيل
وخوذ الاجر كلّه انكان في الصوب اجر ..
ونا أبعدك متحمل ذنوب نشيل

انكنك نويت وداعي ..
شد الرحيل العذر ماله داعي
ونا زاد نكرب من حذاك قناعي ..
عصي الدمع دمعي ما عليه يسيل
ونصبر ونكما لوعتي وأوجاعي ..
الهجر اجر له نلجا جزاه جليل
ولا عاد يسعى في سريبك ساعي ..
قسيت قسوتك سدت عليك سبيل
عواصف خطاك امزّقات شراعي ..
وأخطي بحرك ملاحي بقوة حيل
أحمل الموج مجدافي بقو ذراعي ..
وباتت الريح وقادني الدليل
وشور شط راكح بي جا متداعي ..
حطيت ألقيت ارض تأويني بعد ترحيل

الحمدلله والصلاة والسلام على رسول الله وعلى آله وصحبه أجمعين

السلام عليكم ورحمة الله وبركاته،،

شكرا ً لك على الموضوع

تحياتي

المدير العام للمنتدي