افتراضي ياقلب بالغيظ مليان

ياقلب بالغيظ مليان
أحكي على ماجرالك

لايوجعك غدر الأزمان
ياما غبن من أمثالك

مايعرفن شان بوشان
ولاهن الحد خوذ بالك

أن عاديتهن راك غلطان
مايزعلن من أزعالك

كي الريح تندار سبحان
اتجي معاك واتجي اقبالك

ياقلب خليك مطمان
اللي صار لك بأذن مالك

والله مابيد لأنسان
ولا يديرلك لو لوالك

حال غايتي يالعصران
الها الوقت يبرد اجلالك

مايغربك راي حبان
غروبهم ارقاق المسالك

وباعوا الراس بالذان
من سواد رايهم الهالك

ياغزالتي فالأوطان
مايغربك شي جمالك

يفنى الحي والزوق يدفان
وأن جا الشيب رداه هالك

ياتاجر السو خسران
مهما اربحت المعارك

يمشي زمان وإيجي زمان
وإيجي سلاك صاحب سوالك

وياسامر الليل جضران
تعال هنا فضيه بالك

انكان كنت ع الحال زعلان
تلقى احوال ترضى ابحالك

الشاعر / عابد بوخمادة