غريبة

كم من كلام ينقال؟!
ومن كلمات تحتاج لكتيبة؟!
وكم من حال يغني ع السؤال؟!
ومن حاجات في الدنيا غريبة؟!

1 )
تلاقوا فتاة وفتى
وكيف أصحابهم داروا غلا
جمعهم عشق ..
جمعهم هوى
وطاروا بحب في كبد السماء .
ولاعاد شافوا حد .
لاعاد راهم حد .
وبعد فترة ردوا ..
متباعدين ..
وفي الخطاوي يمدُّوا
قال : جرحتني
وقالت : جرحني
وقال : حرقتني
وقالت : حرقنى
وما همهم في الجرح ..
ولا همهم في الحرق .
اللي همهم ..
كيف الحبيب يجرح حبيبه ؟!.
وكيف الحبيب يحرق حبيبه ؟.
حاجة غريبة !!.

2)
تلاقوا اثنين أصحاب ..
يحبوا بعضهم زين .
لثنين في عز الشباب ..
وللمال محتاجين .
اتفقوا يديروا شركه .
كيف غيرهم واللى يجيهم بركة .
داروا فلوس من بعد الفلاس ..
والحب أصبح للفلوس امداس .
وطاح الحشم من العين ..
صارت عركة .
وما همهم في الناس ..
لا همهم في العركة .
اللي همهم ..
كيف ايفصلوا هالشِرْكة ؟.
وكيف كل حد يزيد فوق نصيبه .
حاجة غريب’ !!

3)
في أول يوم تعارف بيه .
وثاني يوم حضنه بقوة .
وثالث يوم توالف بيه ..
وغير سيرته ما ليه دوة .
ويا معاه .. يا يدوّر فيه .
وإن غاب ساعة في لخرى يجيه
وتعرف بخوته ..
وجيرته وبن عمه .. وبوه وأمه .
وإن كنهو قدر ..
حتى اسماه للعيلة يضمه .
وبعد هذا كله ..
بانت العلة ..
نفضه بقوة .
والنفض بعد الضم ..
كما المدح بعده ذم ..
قلة مروة .
واللي قبَلْ بشيء ..
واجب عليه إيقله .
إلا نفس صاحبنا ما ليها ملّة .
للكره دارت قصر ..
وللحب دارت زريبة .
حاجة غريبة !!

4)
وإيش ذنبها ؟.
هو المِسَّبِّل .
يدوّر عليها .
ووين مايريها اعيونه يذّبل ..
والسانه يتكبّل .
وتقوله : شيلني بالله من تفكيرك
يحسابها تدلّل .
وتقوله : قلبي انشغل بغيرك ..
يزعل ويجفلْ .
وصار متخبّل .
وشكله تبدّل .
وذبّل النظر غاب حسه
وانتشرت القصة .
مسكين قالوا عليه
الباين تبيه ..
عطتهله بكتيبة .
حاجة غريبة !!

5)
قال : صاحبي وهو رفيق العمر
وبلا شورته ما انخوض في أمر .
اخترته رفيقي ..
من دون كل الناس .
واللي رفيقة الزين ..
ما يواطي الراس
نظيف وعفيف
وأصله شريف
إحساسه رهيف
وفي طبعه الكرم
خفيف ونظيف
وما فيه ما يِنْذَمْ
وتغير عليه الحال ..
غيّر كلامه وقال ..
ما قال مالك في الخمر
وما قال عنصرى في السمر
وما قالت أمريكا في الهنود الحمر
وكيف ما بدت
الصحبة انتهت
ما هي غريبة .
إلا بعدها تبقى نميمة وغيبة ..
حاجة غريبة!!

6)
جالس يفكر في مشاغل يومه ..
وفجأة إلتفت
في جنبه لقي زهرة ..
في شذاها شكوى وما شكت .
شذاها يقول :
أوصافي جميلة
وانسومي عليلة
انفوح بمحبة ووّد .
نرجى في قسمي كل يوم الليلة
وانعد الليالي عدْ .
ماني اللي من دون عيلة
ولاني عدوة حدْ .
لاني عليلة
ولاني ذليلة
وليش ما قطفني حدْ .
ولاني بخيلة
ولاني ثقيلة
وليش ما قطفني حدْ .
غيري خذوها ..
ومن الغصن هللي جنبنا قطفوها
ومش كل من خذوها تفوح ..
لا كل من خذوها رموها .
وما من زهور وذابلة بجروح
وكان جاها النصيب ايجوها .
وهذا النصيب ..
طبعه غريب ..
يخطرله إيجي
ويخطرله إيغيب .
وبالله .. وينه نصيبي .
خاصمت شوكي ف شانه
وزينت له الطريق
وفرشت قلبي حنانة .
كني سمعت الباب ..
انقول النصيب جاني
وبيحطني في كتاب .
لكن نصيبي غاب
عليا ابتعد خلاني .
ما لي رفق لا أصحاب .
وهذا النصيب ..
أمره عجيب ..
يصاحب عدو ويعادي حبيب .
ويلوموا عليا ..
إتقول مني السبب .
ومني أنا أصل الشقا
وأصل التعب .
وتقول في غيبة نصيبي عيبة .
حاجة غريبة !!